Orta İxtisas Polis Məktəbi

Naxçıvan Muxtar Respublikası Daxili İşlər Nazirliyinin Orta İxtisas Polis Məktəbi 1997-ci ildə Azərbaycan Respublikası Daxili İşlər Nazirliyinin A.N.Heydərov adına Sıravi və Kiçik Rəis Heyəti Hazırlayan Məktəbinin filialı kimi polis nəfərlərinə ilkin hazırlıq kursu keçmək məqsədilə yaradılmışdır. Azərbaycan Respublikası daxili işlər nazirinin 18 iyul 2003-cü il tarixli 292 nömrəli əmri ilə Naxçıvan Muxtar Respublikası Daxili İşlər Nazirliyinə bilavasitə tabe olan Sıravi və kiçik rəis heyəti hazırlayan məktəb kimi muxtar respublika DİN-in strukturuna daxil edilmişdir. Naxçıvan Muxtar Respublikası Ali Məclisi sədrinin 5 mart 2018-ci il tarixli 107-V FR nömrəli fərmanı ilə Naxçıvan Muxtar Respublikası Daxili İşlər Nazirliyinin Sıravi və Kiçik Rəis Heyəti Hazırlayan Məktəbinin bazasında xüsusi təyinatlı orta ixtisas təhsili müəssisəsi kimi Orta İxtisas Polis Məktəbi yaradılmışdır. Məktəbin fəaliyyətinin əsas istiqaməti daxili işlər orqanları üçün orta ixtisas təhsilli zabit kadrları hazırlamaq və daxili işlər orqanları əməkdaşlarının əlavə təhsil almalarını təşkil etməkdir.

Məktəbdə təhsil 2 ildir. Məktəbi bitirənlərə “hüquq mühafizə fəaliyyəti” ixtisası üzrə subbakalavr diplomu və “polis kiçik leytenantı” xüsusi rütbəsi verilir. İlkin hazırlıq kursuna cəlb olunmuş sıravi və kiçik rəis heyəti əməkdaşlarına isə müvafiq sertifikat verilir.